Menntun og hæfni metin til launa í kjarasamningi við sveitarfélögin
Höfundur
Gauti Skúlason
Í gær skrifuðu Viska og samninganefnd Sambands íslenskra sveitarfélaga undir kjarasamning til fjögurra ára.
Samningurinn, sem gildir afturvirkt frá 1. apríl, felur í sér mikilvægar breytingar sem eru til þess fallnar að breyta launaumhverfi félagsfólks Visku sem starfar hjá sveitarfélögum. Meðal nýjunga er að háskólamenntun er hærra metin til launa og sveitarfélögum er gert heimilt að greiða launaauka fyrir sérstaka frammistöðu og hæfni í starfi ásamt öðrum þáttum.
„Þetta er stór sigur fyrir okkur,“ segir Brynhildur Heiðar- og Ómarsdóttir, formaður Visku. „Við höfum lengi talað fyrir því að fagleg hæfni og menntun fái aukið vægi í launum og er þetta skref í þá átt. Samningurinn gerir sveitarfélögin enn fremur samkeppnishæfari gagnvart sérfræðingum.”
Samningurinn verður kynntur félagsfólki á næstu dögum og fer svo í atkvæðagreiðslu, með það að markmiði að launahækkanir skili sér afturvirkt um næstu mánaðamót.